PORTFOLIOA

Ikasturtea amaitzen ari da eta udako oporrak iristear daude, beraz, Blog honi amaiera emateko ordua iritsi da. Horretarako, azken hausnarketa bat egingo dut, lauhilekoan zehar landu duguna biltzen saiatuz, eta horren inguruko nire iritzia konpartituz.

Ikasturte hasieran, irakasleak klasean ikusitakoaren inguruko Blog bat egitea proposatu zigun, non ikasgelan landutakoa eta gaiaren inguruko gure hausnarketa txikiak konpartitzeko aukera izan dugun. Hasieran, galdu samar ikusi nuen nire burua, izan ere, ez nuen lehenago blog  bat egiteko aukerarik izan, eta beldur pixka bat eduki nuen zenbait unetan. Gerora, ikasgaia ulertzen joan ahala hobeto ikusi naiz, eta azkenean nahiko gustura sentitu naiz blogarekin eta bertan egindako hainbat hausnarketekin. Beraz, amaiera emateko blog-ean zehar idatzi dudanaren oroimen txiki bat egingo dut bertan idatzitakoa ber gogoratzeko.

Lehenengo astean, irakasgaiari hasiera eman genion, eta landutako lehen pertsonaia ezaguna Ivan Illich izan zen. Bere pentsamenduak eta ideiak lantzen aritu ginen, hiru kapituluren bidez. Bakoitza irakurri ostean, galdera batzuk erantzun behar izaten genituen eta esan beharra dago, hasieran testuak ez zirela batere errazak ulertzeko, baina gero irakaslearekin eta klase kideekin zalantzak argitzeko aukera izan dugu une oro.

Ondoren, gorputzaren esanahiaren garrantziaren inguruan aritu ginen hizketan. Irakasleak ikusarazi digu gure egunerokoan gorputzek duten garrantzia eta zenbat gauza transmititzen ditugun honen bitartez. Horretarako bi jarduera proposatu zizkigun; lehenengoan, eskolako gorputzak aztertu eta hainbat argazki esanguratsu atera behar izan genituen. Bigarren ekintza berriz, eskolaz kanpoko gorputzetan zentratzea izan zen eta hauei ere beste hainbeste argazki atera genizkien. Denon artean hainbat irakurketa desberdin atera genituen argazki bakoitzetik eta oso interesgarria izan zen gorputzek transmititutako mezuak irakurtzea.

Berriro ere Illich-en pentsamenduaren lanketari helduz, lehenago irakurritako kapituluen performance-ak egiten hasi ginen taldeka. Performance bakoitzean, kapitulu batetik hartutako ideia bat lantzen genuen, eta gero denon artean zer mezu helarazi nahi izan den komentatzen genuen. Denon artean ideia interesgarri ugari atera ziren eta elkar osatuz joan ginen. Asko gustatu zait kontzeptuak lantzeko metodo hau, izan ere, gauzak era ezberdinean planteatzen eta ikusten laguntzen du, eta gainera oso dinamikoa eta entretenigarria egin zait.

Performance-ekin amaitutakoan, ikasteko beste hainbat modu alternatibo lantzen hasi ginen; horien artean homeschooling-a. Lehenagotik landutako kontzeptua zen hau, baina ondo etorri zaigu ber gogoratzeko eta beste pare bat buelta emateko gaiari.

Gerora, Tom Boy izeneko pelikula jarri zigun klasean irakasleak. Asko gustatu zitzaidan pelikula, errealitatean aurki ditzakegun egoera askori egiten bai die erreferentzia eta generoaren gaiaren inguruan asko hausnartzera eraman nau. Etorkizuneko irakasle gisa oso baliagarri iruditu zait eta uste dut presente eduki behar dugun gaia dela, haurrei errealitatea naturaltasunez erakustea eta dauden aukera guztiak eskaintzea ezinbestekoa da egoera hauek ekiditeko.

Arlo teorikoan murgilduz, curriculuma lantzen hasi ginen. Hasieran asko kostatu zitzaigun curriculum mota bakoitza bereiztea, denak antzeko kontzeptuak iruditu zitzaizkigun eta, baina irakasleak curriculum mota desberdinei argazkiak ateratzearen lana bidali ostean, argiago gelditu zait zein den bakoitza. Gainera, orain lehen jartzen ez nuen harreta jartzen dut gauza askotan eta hori oso erabilgarria dela uste dut.

Ikasturteko modulu lana egiteko, Salburua parke naturalera joan ginen ni eta nire taldekideak. Gerora, horri lotutako unitate didaktikoa ere proposatu ziguten, matematikako zatia osatzeko. Lan honi denbora asko eskaini behar zaio, eta egia da ikasturte amaieran hainbat lan pilatu zaizkigula eta denboraz larri samar ibili garela atal batzuetan, baina azkenean lortu dugu amaitzea. Orokorrean nahiko agobiatuak ibili gara lan honekin.

Lan modularra egin bitartean, beste hainbat lan ere egin ditugu. Testu batzuk irakurriz, metodologia mota desberdinak ikasi ditugu. Oso erabilgarria izan da nire iritziz irakasteko beste modu batzuk ikastea, betiko era memoristiko tradizionaletik aldendu ahal izateko ezinbestekoa da eta. Bestalde, eskola eta gizartea islatzeko helburuarekin, kartografia bana egin genuen taldeka. Hau izan da nire lan gustukoenetakoa, izan ere, oso gauza ezberdinak atera dira talde bakoitzetik. Bakoitzak bere enfokea eman dio eta irakurketa desberdinak atera dira elkarrengandik, baina denak lan bikainak. Asko gustatu zait gure ikuspuntua horrelako era desberdin batean adierazi ahal izatea.

Honetaz gain, eskola mota desberdinak ere landu ditugu, metodologia eta ezaugarri ezberdinak eskaintzen dituztenak. Hau ere baliagarria izan da betiko metodologia tradizional zaharkitua alde batera utzi eta beste metodo berritzaileago batzuk ezagutzeko.

Astunagoak edo lan karga handiagoa duten lan hauetaz gain, beste hainbat jarduera ere egin ditugu. Hainbat bideo ikusi eta testu irakurri ditugu gai desberdinen inguruan; esaterako irudien biolentzia, Esther Ferrer-en performance-ak, Examined Life bidea, Beatriz Preciadoren elkarrizketa, edota konpetentziei buruzko hainbat bideo. Interesgarriak izan dira orokorrean eta denetatik zerbait berria ikasteko aukera izan dut, eta bideo hauetako askok, gai hanitzen inguruan hausnartzeko ateak zabaldu dizkidate.

Hau guztia azalduta, ikasturtea amaituko genuke, beraz, honaino iritsi da Blog-a. Espero dut zuen gustukoa izana eta era batean edo bestean erabilgarria izatea. Mila esker irakurtzeagatik.

Hurrengo arte!